ಮೊಗಾಳ್ ಪೆರುವಾಯ್ ಫಿರ್ಗಜ್-ಗಾರಾಂನೊ, 

 ವಿಗಾರಾಚೊ ಪ್ರಣಾಮ್. ಪೆರುವಾಯ್ ಫಿರ್ಗಜೆಂತ್ ಜಾಂವ್ಚ್ಯಾ ಸರ್ವ್ ಕಾರ್ಯಾಂಕ್ ಕಾರಣ್ ಆಮ್ಚಿಂ ಪಾತ್ರೊನ್ ಫಾತಿಮಾ ಮಾಯ್. 2025 ವರ್ಸಾಂ ಆದಿಂ ತಿಣೆಂ ಗಾಯ್ಲೆಲೆಂ ಕೀರ್ತನ್ ’ಅತ್ಮೊ ಮ್ಹಜೊ ಸೊಮಿಯಾಕ್ ನಾಂವಾಡ್ತಾ’ ಆಮಿ ಪೆರುವಾಯ್ ಗಾರಾಂನಿ ಹರ್ಯೆಕ್ಲ್ಯಾನ್ ದೆವಾಕ್ ಅರ್ಗಾಂ ದೀವ್ನ್ ಗಾಂವ್ಕ್ ಸಹಜ್-ಲ್ಲೆಂ ಗೀತ್. ಹ್ಯಾ ಪೆರುವಾಯ್ ದೊಂಗ್ರಾಂತ್ ಅಜಾಪಾಂ ಕರ್ನ್ ಆಮ್ಕಾಂ ತಿಣೆಂ ಊಂಚ್ ಉಬಾರ್ಲಾಂ. ಆಶೀರ್ವಾದಾಚೊ ಶಿಂವೊರ್ ತಿಣೆಂ ಆಮಾ ಸಮೆಸ್ತಾಂಚೆರ್ ವೊತ್ಲಾ. ಪೆರುವಾಯ್ ಫಿರ್ಗಜೆಂತ್ ಚರಿತ್ರಾ ಘಡ್ಲ್ಯಾ. 25 ವರ್ಸಾಂ ಆದಿಂ ಹ್ಯಾ ದೊಂಗ್ರಾರ್ ಮಿಸಾಚೆಂ ಬಲಿದಾನ್ ಪ್ರಾರಂಭ್ ಜಾವ್ನ್ ಲೊಕಾಕ್ ಸಾಂಗಾತಾ ಯೆಂವ್ಚ್ಯಾಕ್ , ಎಕ್ವಟ್ ಪಾಚಾರ್ಚಾಕ್, ಸಾಂಗಾತಾ ವಾವ್ರ್ ಕರ್ನ್ ಸರ್ವ್ ಕಾರ್ಯೆಂ ಸಂಭ್ರಮ್ಚ್ಯಾಕ್ ಕಾರಣ್ ಜಾಲೊ.

 ಹಿಂ ಸಗ್ಳಿಂ ಕಾರ್ಯೆಂ ಸರ್ವಾಂಚಾ ಹೊಗ್ಳಿಕೆಕ್ ಪಾತ್ರ್ ಜಾಲಾ ತರ್, ಗೊವ್ಳಿಕ್ ಮಂಡಳೆಂ ಸವೆಂ ವಾಡ್ಯಾಚ್ಯಾ ಗುರ್ಕಾರಾಂನಿ, ಪ್ರತಿನಿಧಿಂನಿ, ವಾಡ್ಯಾಂಚಾ ಸರ್ವ್ ಲೊಕಾನ್ ವಾವ್ರ್ ಭೆಟಯ್ಲಾ, ಕಾರ್ಯೆಂ ಸೊಭಯ್ಲಾಂ, ಶಾಭಾಸ್ಕಿ ತುಮ್ಕಾಂ.

ಪಯ್ಲ್ಯಾನ್ ಪಯ್ಲೆಂ ಮ್ಹಜೆಂ ಸವೆಂ ಗೊವ್ಳಿಕ್ ಮಂಡಳೆಚ್ಯಾ ಸಾಂದ್ಯಾಂನಿ ಕುಟ್ಮಾಂಕ್ ಭೆಟ್ ಕರ್ನ್, ಲೊಕಾಚಿ ಸ್ಥಿತಿಗತಿ ಸಮ್ಜೊನ್ ಘೆವ್ನ್ ಫಿರ್ಗಜ್ ಕುಟಾಮ್ ಜಿವಾಳ್ ಕರ್ಚ್ಯಾಕ್ ಥೊಡಿಂ ಕಾರ್ಯಕ್ರಮಾ ಮಾಂಡುನ್ ಹಾಡ್ಲಿಂ. ಭುರ್ಗ್ಯಾಂಚೆ ಶಿಬಿರ್, ಆಲ್ತಾರ್ ಭುರ್ಗ್ಯಾಂಚೊ ದಿವಸ್, ಆಟಿಂತ್ ಏಕ್ ದೀಸ್, ಕಾಜಾರಿ ಜೊಡ್ಯಾಂಚೊ ದಿವಸ್, ಮಾಲ್ಗಡ್ಯಾಂಚೊ ದಿವಸ್, ರೆತಿರ್, ತೈಝೆ ಮಾಗ್ಣೆ. ಹಿಂ ಸರ್ವ್ ಕಾರ್ಯಕ್ರಮಾಂ ಯಶಸ್ವೆನ್ ಸಂಪ್ಲ್ಯಾಂತ್ ಲ್ಹಾನಾಂ ಥಾವ್ನ್ ವ್ಹಡಾಂ ಪರ್ಯಾಂತ್ ಹ್ಯಾ ಕಾರ್ಯಾಂನಿ ಕ್ರಿಯಾತ್ಮಕ್ ಪಾತ್ರ್ ಘೆತ್ಲಾಂ. ಶಿಬಿರಾಂಚೊ ಭರ್ಪೂರ್ ಫಾಯ್ದೊ ಜೊಡ್ಲಾಂ.

ಆಜ್ ಫಿರ್ಗಜ್ ಕುಟಾಮ್ ಪ್ರಗತೆಚಾ ಪಾವ್ಲಾಂನಿ ಚಮ್ಕೊನ್ ಆಸಾ ತೆಂ ಪಳೆಂವ್ಕ್ ಮ್ಹಕಾ ವರ್ತೊ ಸಂತೊಸ್, ಹಾಕಾ ಕಾರಣ್ ಸಬಾರ್ ಬರ್ಯಾ ಮನ್ಶ್ಯಾಂಚೆ ಉದಾರ್ ಮನ್ ಮ್ಹಳ್ಯಾರ್ ಚೂಕ್ ಜಾಂವ್ಚಿನಾ. ಜರ್ ಕುಟ್ಮಾಚಿ ವಾಡಾವಳ್ ಜಾತಾ, ಆರ್ಥಿಕ್ ಪರಿಗತ್ ಬದ್ಲಾತಾ ತರ್, ತೆದ್ನಾಂ ಫಿರ್ಗಜೆಚಿ ವಾಡಾವಳ್ ಜಾತಾ. ಹಾತಿಂ ಘೆತ್-ಲ್ಲಿಂ ಜಾಯ್ತಿಂ ಯೋಜನಾಂ ಸುಫಳ್ ಜಾಲ್ಯಾಂತ್.

ಆಮ್ಚ್ಯಾ ಫಿರ್ಗಜೆಂತ್ ವಾಡೊ ಜಿವಾಳ್ ಆಸಾ. ವಾಡ್ಯಾಂತ್ಲೊ ಹರ್ಯೆಕ್ಲೊ ಸಾಂಗಾತಾ ಯೇವ್ನ್ ಫಿರ್ಗಜೆಚ್ಯಾ ಬರ್ಯಾಪಣಾ ಖಾತಿರ್ ವಾವ್ರ್ ದಿಂವ್ಚೆ ನೀಜ್ ಜಾವ್ನ್ ಹೊಗ್ಳಿಕೆಚೆಂ.

 ಅನಿಕೀ ವಾಡ್ಯಾಂತ್ ಚಡ್ ಆನಿ ಚಡ್ ಎಕ್ವಟ್ ಬಾಂದುನ್ ಹಾಡುಂಕ್ ಆಸಾ. ’ಎಕಾ ಕಾಳ್ಜಾಚಿಂ ಎಕಾ ಮನಾಚಿ ಜಾವ್ನ್’ ಸುರ್ವಿಲ್ಯಾ ಕ್ರಿಸ್ತಾಂವಾಂ ಬರಿಂ ವಾಂಟುನ್, ಸೆವಾ ಭೆಟವ್ನ್ ದೆವಾಚಾ ಪ್ರೇರಣಾ ಖಾಲ್ ಜರ್ ಸಾಂಗಾತಾ ಯೇವ್ನ್ ವಾವ್ರ್ ಭೆಟಯ್ಲೊ ತರ್ ಕ್ರಿಸ್ತಿ ಸ್ಪಿರಿತ್ ದಾಕಯ್ಲೊ ತರ್ ಆಮ್ಚಿಂ ಫಿರ್ಗಜ್ ಜಿವಾಳ್ ಕಾರ್ಯಾಳ್ ಜಾಂವ್ಚ್ಯಾಕ್ ನವಾಲ್ ನಾಂ.

ಸಮುದಾಯ್ ಭವಾನಾಚಿ ಉಗ್ತಾವಣ್ ಮೇಯಾಚ್ಯಾ 05 ತಾರೀಕೆರ್ ತಯಾರ್ ಜಾಲಾಂ ಅಸ್ತಾಂ, ಹ್ಯಾ ಸಂಭ್ರಮಾ ಪಾಟ್ಲ್ಯಾನ್ ಸಬಾರಾನಿಂ ಸಹಾಕಾರ್ ಅನಿ ಕುಮಕ್ ದಿಲ್ಯಾ. ಫಿರ್ಗಜೆಚ್ಯಾ ಸಬಾರ್ ಕುಟ್ಮಾಚ್ಯಾ ಸಾಂದ್ಯಾಂನಿ ಕುಮೊಕ್ ತಶೆಂಚ್ ದಾನ್ ದಿಲಾಂ. ಸಬಾರಾಂನಿ ಸಾಂಜೆಚಾ ವೆಳಾರ್ ಯೇವ್ನ್ ಕಾಮ್ ಕರ್ನ್ ಚಡ್ತಿ ಕರ್ನ್ ಹಾ ಬಾಂದ್ಪಾಚಾ ಕಾಮಾಕ್ ವಾವ್ರ್ ಕೆಲಾ. 

ಎದೊಳ್ ವರೇಗ್ ಸಂಭ್ರಮಾಚಿಂ ಕಾರ್ಯಿಂ ಯಶಸ್ವಿ ಜಾಂವ್ಚ್ಯಾಕ್ ನಿಸ್ವಾರ್ಥ್-ಪಣಿ ವಾವ್ರ್ ಭೆಟಯ್-ಲ್ಲ್ಯಾ ಉಪಾಧ್ಯಕ್ಷ್, ಕಾರ್ಯದರ್ಶಿ, ಆನಿ ಸರ್ವ್ ಗೊವ್ಳಿಕ್ ಮಂಡಳಿಚ್ಯಾ ಸಾಂದ್ಯಾಂಚೊ ಮನಪೂರ್ವಕಿಂ ಉಪ್ಕಾರ್ ಆಟಯ್ತಾಂ. ಗುರ್ಕಾರಾ ಸಾಂಗಾತಾ ವಾಡ್ಯಾಚ್ಯಾ ಲೊಕಾನಿಂ ಹ್ಯಾ ಕಾರ್ಯಾ ಖಾತಿರ್ ಜೀವ್ ದಿಲಾ, ಸಾಕ್ರಿಫಿಸ್ ಕೆಲಾ ಆನಿ ಹೆಂ ಕಾರ್ಯೆಂ ಯಶಸ್ವಿ ಜಾಲಾಂ ಆನಿ ಹಾಚಿ ಸರ್ವ್ ಕೀರ್ತ್ ತುಮ್ಕಾಂ ಫಿರ್ಗಜ್-ಗಾರಾಂಕ್. ಆಮ್ಕಾಂ ಜಾತ್ ಧರ್ಮ್ ಬೇದ್-ಬಾವ್ ನಾಸ್ತಾನಾ ಸರ್ವ್ ಸಾಂಗಾತಾ ಯೇವ್ನ್ ಆಮ್ಕಾಂ ಕುಮೊಕ್ ಕೆಲ್ಯಾ. ಉಪ್ಕಾರ್ ಕೆಲ್ಲ್ಯಾ ಸರ್ವ್ ಅಕ್ರಿಸ್ತಾಂವ್ ಭಾವಾ ಭಯ್ಣಿಂಕ್ ಮನಪೂರ್ವಕಿಂ ಉಪ್ಕಾರ್ ಆಟಯ್ತಾಂ ಆನಿ ದೇವ್ ಬರೆಂ ಕರುಂ ಮ್ಹಣ್ತಾಂ.

ಆಕೇರ್ ಕರ್ಚ್ಯಾ ಫುಡೆಂ ಏಕ್ ಉತರ್ ಸಾಂಗೊಂಕ್ ಆಶೆತಾಂ. ಆಮ್ಚಿ ಪ್ರಗತಿ ಆಮಿ ಆಶೆಲ್ಯಾರ್ ಜಾಂವ್ಚಿ ದೆಕುನ್, ಕುಟ್ಮಾ ಬಾಂದುನ್ ಹಾಡ್ಯಾಂ, ಉಣೆಂಪಣ್ ಭರ್ತಿ ಕರ್ಯಾಂ, ವಾಡ್ಯಾಂತ್ ಕಾರ್ಯಾಳ್ ಜಾವ್ಯಾಂ, ಅಶೆಂ ಫಿರ್ಗಜೆಚ್ಯಾ ಅಭಿವ್ರದ್ಧೆಕ್ ಖಾಂದ್ ಮಾರ್ಯಾಂ.

ಸರ್ವ್ ಫಿರ್ಗಜ್ ಕುಟ್ಮಾಕ್ ದೇವ್ ಬರೆಂ ಕರುಂ. ಅನಿ ಫಾತಿಮಾ ಮಾಯೆಚಿ ಆರ್ಶೀವಾದಾ ತುಮ್ಚೆರ್ ಅನಿ ತುಮ್ಚ್ಯಾ ಕುಟ್ಮಾಚೆರ್ ಮಾಗ್ತಾಂ.

 ಫಾದರ್ ಸೈಮನ್ ಸೋಜ್ 

ವಿಗಾರ್